وجــــــع

النسر طار من ع العلم..

أصبح مكانه ع الكِتاف..
وكفوف بتضرب بالقلم..
م الإبن حتى الجد خاف..
والنور علينا بيتمنع..
والصمت صوته بيتسمع..
والكل ضدك يِجتِمِع..
تلقى الأمل باصص عليك..
لو تمسكه؟ منهم يخاف..
والطفل من حلمه اتحرم..
شوفوا الكرم!!
مين اللي قال اللي إتظلم..
ظلمه يكون أخر المطاف..
والشعب قام من غفلته..
شاف سكته..
يحلف ما يغلط غلطته..
علشان يعيش..
وإزاي يعيش وسط الكلاب..
لو تسرقه..
لو يلقوا حلم بيتولد..
بتعَتِّمه أو تحرقه..
في الوحدة قطعاً دي النهاية..
طب يلا بينا إتفرقوا..
من امتى كنتوا بتِفرِقوا؟!
أو تكسبوا لو تِعرَقوا؟!
طول عمرنا بنعيش عبيد..
ولينا سيِّد نعشقه..
حال الولاد دول مختلف..
ليهم نصيب علشان شِقُوا..
نزلوا عشان ضاع حقهم..
نزلوا عشان الخوف..
يضيع من وسطهم..
شافوا الأمل..
حِلموا..
وشافوا إن النجاح شئ محتمل..
مات اللي مات منهم ومدَّاري بتراب..
قلبي بِكي لو قلتها..
فيكي الشهيد..
أصبح حكاية بتتحكي..
في قصة في كتاب..
والحق لو تجري وراه تلاقيه سراب..
بلد العُجاب..
الكل فيها بيتنسي..
نقفل وراه ميت ألف باب..
والذنب دايماً نعمله..
ولا نغفره ولا حد تاب..
حتى الشباب..
مات في القلوب..
والشعر شاب من ظلمهم..
سيبوا الشباب لو يحلموا..
مين فيكوا مرة حِلِملُهم..
بتشيلوا رمز والعيب أساساً في النظام..
وانتوا النظام..
والقلب م الغُلب إنفَطَر..
هو إنتوا إمتى هتفهموا؟!
سيبوا الشباب لو يحلموا..
مين فيكوا مره حِلِملُهم..
جابوا الولد لأجل إن يثور..
يكبر بحِلم في أرض بور..
ومِشَققة..
ليه يتنصبله المشنقه..
على أرضها؟!!!
مش هو كان ده حلمها..
تِخَلِّف ولد..
داء العبيد فيكي معشش يا بلد..
بعد اللي ضَحُّوا لأجل حلم بتحلميه..
جبتي الولد.. بألم مَخَاضِك إتوءد