سيبُه يبوح من قلبُه يقولك

اهدي وريحّ جداً راسك
قلِّب فكرك بالقلابه
خبط واسأل عن احساسك
سيبه يفضفض ليك بطيابه

سيبُه يبوح من قلبُه يقولك
ان العُمر بيجري بسرعه
وانك مُدمن واقع لكن
هوا كمان محتاج للجرعه

انت بجد غرقت فـ بُكره
داء من صُغرك عُمره ما خف
خيط ملضوم بيلف فـ بَكره
واستسلمت كتير للف

لف فـ لف خلاص مش قادر
يبقي طبيعي تعيشها مغادِر
لو منفوخ من وهم الحاضر
يبقي ضروري تهوي البلف

يا تفرقع م النفخ الحاصل
يا تسيب نفسك وتفسيك
ذكراك حتي ان كانت صعبه
قادره تفٌكك و تنسيك
عُمر الذكري ما تقتل حلمك
ولا حتي يا سيدي تقسيك

هِش الواقع ... ريح ضهرك
خُدلك غُطس بسرعه فـ بحرك
واغرق جداً جداً خالص
اغرق لكن
اغرق فيك