تصميمات مودرن للمساحات الصغيرة

وزى ما قالت مهندسة الديكور "مي مراد" إن الأثاث المودرن بيناسب جداً المساحات المختلفة للشقق علشان كده هي هتساعدنا إزاي نعرف نقسّم المساحات المختلفة بالأثاث المودرن والديكور المناسب، وهنبدأ بالكلام عن الريسبشن وسألناها...

• إزاي نشعر إن الريسبشن الواحد هو أكثر من جزء مختلف عن الثاني!

بالنسبة للأنتريه ممكن تكون الكنبة حرف "L"، وتكون عاملة زي الكورنر وأمامها تليفزيون بمكتبة مصممة على شكل أرفف طائرة، وما بين الأنتريه والسفرة ممكن نفصل بسجادة شكلها ولونها يكون مختلف أو (أرج) أو (بارتيشن خشب) أو (بارافان).

• وإزاي نقسّم مساحة الأرضيات

ممكن نجيب السيراميك أكثر من لون، ونفصل بين كل لون والثاني بـ"البورديهات" وكمان أنواع الباركيه الحديث فيه أكثر من لون غير المسمار والموسكي والأرو، وفي النهاية السجاجيد وحجمها وألوانها بتفصل بين المساحة الواحدة.

• والحوائط إزاي نخليها مختلفة عن بعضها

ممكن نفصل جزء عن جزء بـ"اسبونش" على الحائط، ونضع مثلاً النيش تحتها وفوقه تابلوه شيك؛ يعني ممكن نعمل لوحة فنية بالخشب على الحائط من خلال أخشاب، وممكن كمان نعمل "ألواح فينيل" زي ألواح خشب ملوّنة أو نفصل بورق الحائط الحديث اللي بيكون بألوان مفضضة وذهبية، بالإضافة إلى عملية الخداع البصري المعروفة بالرسومات على الحوائط اللي بتدينا إحساس بأننا في مكان أوسع ومختلف.


تصميمات غرف الأطفال

[فقط الأعضاء المسجلين والمفعلين يمكنهم رؤية الوصلات . إضغط هنا للتسجيل]

• وإيه شكل الأرفف الطائرة

هي أرفف مكشوفة ملتصقة بالحائط أو منفصلة، وبتكشف رؤية ما وراءها، وبتكون عبارة عن فاصل بسيط بين خصوصية الأنتريه والسفرة في المكان الواحد. وممكن نعملها أرفف ثابتة أو أرفف طائرة، وفيه منها دلوقتي أكثر من تصميم؛ يعني ممكن يكون جزء من الأرفف مقفول وجزء تاني مفتوح وليس لها "فريم محدد"؛ يعني بتكون زي علب منفصلة.

وممكن كمان تتفكك ويعاد تشكيلها مرة ثانية علشان ست البيت تغيّر في شكلها بين فترة والثانية، وتعمل نوع من التغيير غير الشكل الكلاسيكي للمكتبات المعروف، وممكن نضع فيها كتب وتحف وزرع وكل شيء.

• وخامات المرايات لسه موضة لحد دلوقتي!

الجديد إننا ممكن نعمل أجزاء محددة من المرايات على الحائط، وبتكون مصممة بوجود براويز صغيرة من خلال الإطار الخارجي للمرايا، لكن فيه خامات ثانية بتعطي إحساس المرايات زي الطوب الزجاجي، وهو عبارة عن طوبة وبداخلها زجاج، والزجاج ممكن يتلوّن بجميع الألوان وبيعطي شكل جمالي وفي نفس الوقت بيقوم بوظيفة الفاصل بين مكان وآخر داخل المساحة الواحدة، وبيكون عازل للصوت كمان ودي منتشرة دلوقتى جداً.

• وبالنسبة للأسقف الساقطة بتكون وظيفتها الإضاءة بس ولّا فيه وظائف ثانية!

الأسقف الساقطة بتسقط بحدود؛ علشان تكون مناسبة لارتفاعها من الأرض، وممكن نستغل السقف الساقط من خلال "بيت نور" أو من خلال اسبوتات، والاسبوت دلوقتي أصبح بديل عن "الأبليك" أو ممكن نعمل داخل السقف الساقط تربيعات نور أو تكييف مركزي.

والسقف الساقط أصبح مختلف عن زمان وليس عبارة عن شبك ممدد، وأصبح يتصنع بسهولة، وهو عبارة عن صاج بيسقط من الحائط، ومبطن بكرتون وخشب معالج وبيتخرم فيه الاسبوت.

• وإيه آخر تصميمات الأنتريهات المودرن وتكون مناسبة للمساحات المختلفة!

هناك أشكال كنب متطوّر فيه حرف "l" وحرف "u"، وممكن يتصمم بالأشكال اللي أنا عايزها، وممكن يضاف إليها كنبة شيزلونج و"بوفات" إضافية، بالإضافة إلى كنب بيتحوّل إلى كرسيين قصاد بعض أو سرير وكلها وظائف مهمة.

وممكن الكنبة تكون لون أما الكرسي والبوف لون آخر لكن لازم تربطهم وحدة واحدة.

• وترابيزة الأنتريه المودرن بيكون شكلها إزاي!

ترابيزة الأنتريه لازم تكون مناسبة لطول الأنتريه، ومتماشية معاه، والسائد دلوقتي الترابيزة المربّعة والمستطيلة والدائري اللي فيها زجاج وتحتها معدن.. وممكن أعمل الترابيزة المربعة والمستطيلة فيها أدراج وأرفف زجاج علشان يظهر اللي تحتها من أدراج ونضع فيها كتب ومجلات أو ترابيزة بداخلها "بوفات" أستعملها وقت الحاجة وفي حالة وجود أفراد كتير.

• وإيه الشكل الحديث لكرسي السفرة!

كرسي السفرة ممكن يكون القعدة متنجّدة بس، أو الظهر والقعدة متنجدين والقماش المتنجد دلوقتي أصبحت خاماته كويسة جداً، بالإضافة إلى الكسوة غير الثابتة، وهي عبارة عن "سوست" بتتفك وبتتغيّر، بالإضافة إلى الكراسي المعدن اللي بيكون بداخلها بلكس وبلاسيتيك متني ولا يتعرّض للصدأ؛ لأنها "مجلفنة".





ودلوقتي هنتعرّف من المهندسة "مي مراد" على أشكال وتصميمات مختلفة للأثاث المودرن..

• إزاي نصمم غرفة معيشة متكاملة الوظائف وألوانها مختلفة!

عندنا في الجاليري غرفة معيشة الحوائط بتاعتها لونها داكن شوية، لكن الأثاث أحمر وترابيزة طعام صغيرة وأرفف وإكسسوارات بسيطة تجمع بين الأسود والأحمر والأبيض.

ده غير كمان إننا ممكن نضع داخل غرفة المعيشة وحدات زرع جميلة.

وهنشوف كمان تصميم آخر لغرفة معيشة استخدمنا فيها الستائر في تقليل النوافذ الكثيرة بها واستخدمناها لعمل مكان خاص للمكتب يمكن أن يختفي وراء الستائر.

• وممكن كمان يكون للإكسسوار دور في تجميل غرفة المعيشة

أكيد.. وده عن طريق تصميم غرفة معيشة تكون ألوانها فاتحة علشان تعطي إحساس بالوسع وتخصيص منضدة صغيرة للطعام مع استخدام الخطوط المقلّمة لتزيينها في الحوائط والوسائد الصغيرة.

أما بالنسبة لتصميمات غرف الطعام المودرن

هنلاقي إن عندنا وحدة طعام منجدة بكراسي لونها فاتح متماشية مع ألوان الحوائط مع وحدات إضاءة مميزة وجريئة.

وعندنا كمان غرفة طعام من الطراز الأسباني واستخدمنا معاها تجويفات الحوائط لعمل إضاءات وأرفف طائرة من الخشب مجلدة من الخلف وبها ترابيزة مستطيلة.

أما الكراسي البلكس جلاس الأسود كانت ملحقة بغرفة طعام مربعة واللون اسود تزاوج مع لون المائدة الأبيض وأعطى شكل مودرن شيك.

• وإيه الأشكال الحديثة لتصميمات غرفة النوم المودرن!

يوجد تصميم لغرفة نوم السرير بتاعها بيكون منخفض والمرتبة ساقطة بداخلها ولا يظهر منها جوانب الفرش وبها وحدات إضاءة حديثة وجذابة.

• وإيه الجديد في تصميمات غرف الأطفال!

لازم نراعي في غرف الأطفال والشباب أنها تكون متعددة الوظائف وبها أماكن لتخزين احتياجاتهم الكثيرة.

يعني ممكن نعمل سرير مزدوج مع الدولاب لأنه يصلح للأماكن الضيقة أو نصمم تحت السرير صناديق مزينة بنفس روح الغرفة للتخزين، ويراعى وضع الدولاب مع أي زاوية في الغرفة علشان يعطي مساحة أكبر للغرفة.

وأهم حاجة في غرفة الأطفال اللعب بالألوان الغير تقليدية زي الأزرق والأحمر، والإكسسوارات المناسبة لجو الطفولة والشباب مع التناسق بين ورق الحائط أو الدهان وبين الستاير والسجاد.

إلى اللقاء،،،
نقلت لكم احد اللقاءات مع مهندسة ديكور مشهورة ومتميزة - تمنياتى بالاستفادة