ايام زمان

ايام زمان




ساق الله على زمان .............. ما احلى الاهل يوم يلتمه

كل واحد منا ما ينام .............. الا على فراشه وبحضن امه

ولازم كل يوم يزور .............. دار سيده وخاله او دار عمه

كيف يلعب ويفرح ............... وكيف يقضي يومه هو همه



ساق الله على زمان................ اصغار بالحارة نلعب

طميميه ونط الحبلة ................ حتى المغرب ما نتعب

الحقة وعالي وطوط .............. حتى عظم جسمنا يصلب

مرجيحا بغصن التوتة ............ ما في شي علينا يصعب



ساق الله على زمان ................ راح وعمره ما برجع

بالشتا بحد الكانون ................ الـكل نعقد نسهرونتجمع

نوكل بسيسة مع قطين ............. وخراريف ستي نسمع

نص مصيص وحديدون............. وجحا والحجر البلمع



ساق الله على زمان ................ قلم ودفتر وكتاب

ايات وقصائد نحفظ ................ وقصة باسم ورباب

ويلي مش حافظ درسه ............... يا ويله من العقاب

نقيم الدنيا ونقعدها ................ اذا يوم المعلم غاب



ساق الله على زمان ................ على كروم العنب والتفاح

منه نعمل احلى مربا ................ طعمه بثمي لسى ما راح

المنسف بالسمنة البلدية ............. والكشك بالشوربا اذا ساح

ما ازكى طعم المسخن................ بخبز الطابون اذا فاح



ساق الله على زمان .................. على بيرقوزا والعين

ننطر دورنا ونستنى .................. كل عيله الها يومين

واذا بدك اي واحد .................. تسئل عنه على العين

كل اهل وناس هالبلد ................ يكونوا هناك مجتمعين



ساق الله على زمان ................ والحفلة بالمشاعل مضوية

ندبك احلى الدبكات ................. عالوحدة ونص والشمالية

ويا حلالي يا مالي .................. ونسهر حتى الصبحية

والزفة على حصان ................ والعريس تحت الشمسية




ساق الله على زمان ................ راح وما عاد عمره يعود

همنا نحافظ على هالتراب ........... غالية لانها ارض الجدود

على الدابة نحرث الارض ........... نتعب واحنا ماسكين العود

نقش الشوك ونشيله بايدينا ............. حتى ينبت مكانه ورود



ساق الله على زمان ................كل شي فيه ولى وراح

كنا نعيش باخوية ................. وما كان فينا اي جراح

ايام حلوة يا ابنية ................... الكل يلبس ثوب فلاح

عباية وكبر ومزوية ................ حطة شماغ وعقال لواح



ساق الله على زمان ................ نفرح ونحزن سوى

الكل يروح ويتجمع ................ اذا حد لفحه الهوى

الجار يشعر بجاره ................ماينام اذا جاره انكوى

على حب الخير تربينا ............. ومن نعبه الكل ارتوى



ساق الله على زمان ................ خير وبركة والله كان