لانك سكنت الروح شميت روحي

لمّلمت يدي فوق صدري بضمّك
لانك سكنت الروح .. ضمّيت روحي

واخذت ادورني على اطراف كمّك
واستنشق غْيابك من انفاس بوحي

مع شهقة احساسي بنشوه أشمّك
يثمل شعوري من مواويل نوحي

وليا نثرتك شوق ودي ألمك
تعال واسكن ما بقى من صروحي

تعبت أنشد عنك خالك وعمك
لين نتحب صوتي بغصة شروحي

أقرى الجواب اللي فضح عين أمّك
تعرف سؤالاتي بدمعة وضوحي

شفني رشفتك حلم من طهر يمّك
وتورق على صدري نواوير دوحي

وافرك عيوني ترحل اسراب غمّك
واحضنك في جفني تسيل بجموحي

ياما سقيتك وصل روّيت دمك
واسكبك من موقي ترمم جروحي

واشرب سهاد الليل من بير همك
أروي ظما عينك ببسمة مزوحي

واغسل بزوغ الفجر من نور جمك
وانت اتثاوب يركض الصبح يوحي

همسة: "صباح الحب" تشرق بفمك
ترسم على وجنات عمري طموحي

طيّبت بك روح المشاعر بشمّك
لانك سكنت الروح شميت روحي