انا بنت سينجل وهو برضوا سينجل

أنا حلوه و صغيره

لا طويله و لا قصيره

El –New Remix

انا حلوه و كنت صغيره

طويله و قصيره

و لسه سينجل !

زي كل زميلاتي في الدفعه لسه قاعده مستنيه نتيجة التنسيق .. مش بتاع وزارة التعليم

نوئواااا نوئوااا

تنسيق وزارة الأوقاف لرعاية شئون دار عوانس القاهره الكبرى و على كل القرى المجاوره مراعاة فروق التوقيت .

لاحظت ان معظم بنات جيلي (اللي هما مواليد اول اول إمبارح ) لسه سينجل !! و كلهم عاملين أكتيفاشن لخاصية الأنتظار و مستنيين لامؤاخذه العدل .

فقررت بصفتي مواطنه قوقازيه و من نفس هذا الجيل و من هذا المذنق البحث في هذه الظاهره المستمره ( إلاهي يحرقها ) فوجدت في كتب التاريخ الأتي:-

كان يا مكان في سالف العصر و على شريط المزلقان

ست بنت حلال شغلتها تزويج البنات

الحلوه و الحادقه من كل المقاسات

و كانت إلاهي يسعدها و يرحمها برحمته حفظالها كام جمله حصلت بيهم على الرقم القياسي في تزويج أكبر عدد من البنات و الستات اللي خلفوا صبيان ما بيتجوزوش و بنات مستنيين الفرج كل يوم تلات .

-” البنت يا بوثينه عليها دقية باميه تجنن- مش ابنك فوزي انشاء الله ليه في الباميه؟ “

-”مال و جمال و اصل يعني عروسه من الإخر- بس انت اتكل على الله و متقولش فاااكس “

-”ديه مقرشه يا إبني بتشتغل مدرسه بقالها سنين و بتدي دروس و عملتهم خلاص – و اسمع ان عندها بلاي ستيشن فور “

-” عندها شقه في مارينا – شقه في مارينا ! فاهم يعني إيه شقه- يعني كارنيه دخول من البوابات – يعني تسافر كل ويك اند- يعني رز بلبن من عند صابر – فكر كده “.

و راحت ست الحته !

في ظروف غامضه في ليل يوم ممطر لوكيشن داخلي فردي إختفت الست الخاطبه و راح معاها سر شويبس .

و من البلاك داي ده كل ما بنت تفلت براجل و تعبر بيه خط برليف و تتجوز تعمل فستان كبيييييييييييييير تداري تحتيه ركبتها الوارمه اللي بتتهري قرص من صحباتها و جاراتها و كل عابرة سبيل و بنت البواب و الأخوات في طنطا و كل بناتنا في الصعيد الجواني و ياللي من البحيره و ياللي من أهل الصعيد … اللي نفسهم يتجوزوا و شايفين ان الحل في الركبه !

و ده نداء من شعب جمهوريتنا لكل مسئولي الدوله بضرورة إنشاء قسم “الست الخاطبه” الى اقسام كلية الألسن في سبيل أحياء هذا التراث و إنقاذ الثروه النثائيه من الأنقراض .

يرجع موضوعنا تاني لمرجوعنا :-

بما ان البنت سينجل فالولد اكيد بردك سينجل !

طب ايه ! ها ؟ ايه ؟؟؟

على من يتوصل الى الحل: – اتصل بسبعه و اربعين ميه و عشرين اذاعه و ترك الاجابه بعد سماع الزغروطه