ياهاجسي حان الوعد والكيف في صفـر الـدلال

//

ياهاجسي حان الوعد والكيف في صفـر الـدلال
والدلـة الصفـرا يــداوي علـتـي فنجالـهـا

ماني خلي يوم ألعب المنكوس في ذيـك الطـوال
وأجـر صوتـي واردف الونـة علـى موالهـا

كله سبايب هاجسن فـي وسـط قلبـي لايـزال
يسهـر عيونـي والضمايـر مغلقـات أقفالـهـا

يهزني برق الحيا لا لاح فـي عـرض الخيـال
والمزنـه اللـي ينتثـر فـوق الثـرى همالهـا

ويشوقني نوح الحمام إليـا سجـع والظـل مـال
واسترسلـت نغماتهـا والشمـس مـال ظلالهـا

أنا بدوي ومنوتي شـوف الصحـاري والرمـال
نجد العذية عشقتـي واطـرب لشـوف رمالهـا

ماني بأشجـع نـادي الأهلـي واصفـق للهلال
لـو إن كلـن لـه ميـول وكـل نفـس ومالهـا

أنا هوى بالـي إليـا شفـت الزبايـر والجبـال
مهامـلـن راع الـعـزوم الهيـنـه ماجالـهـا


أنا هوى بالي صحاري نجد كـان السيـل سـال
هي منوتـي والنفـس ماترضـى بغيـر آمالهـا

أليا سقاها المعتلـي مـن رايـح الوسمـي زلال
وأمست خباريهـا تطـارد والبـرد فـي جالهـا

حتى يزوف النبت فالريضـان والمنظـر خيـال
طب العليل اللـي شكـى بقعـا وكثـر أشغالهـا

حتى يغني راعـي الـذود الضعيفـات الهـزال
يعتاض في غلي العلف والـذود يصلـح حالهـا

وأنا هـواي ورغبتـي فـج الخـلا والإرتحـال
وابعد عن اللي لا لقـى الكلمـة يجـي مشتالهـا

اللي مساعي مهنته مـع قـوم قيـل وقـوم قـال
اهـل النمايـم والـردى لا طيـب الله فالـهـا

سلـط علـى راع النمايـم والـردى والإحتيـال
يحتال في علـم الـردى والطيبـة مـا احتالهـا

الرجل كانه مارفع نفسه عـن الهـرج الخمـال
وش ينبغى بـه فـي الأمـور دقاقهـا وجلالهـا

والكلمة اللي ماتجمـل فـي المواقـف للرجـال
أخيـر مـن قلاطهـا ياهـل النظـر همالـهـا

والعاقل اللي يـوزن الكلمـة ليـا جالـه مجـال
يبدي جزيل الهـرج والكلمـة يعـرف ارسالهـا

تلقى علومه في المواقف كنهـا صـرف الريـال
تصغي لها العراف وأهـل المعرفـة تصحالهـا

وعز الرجل لامن وقف بيـن الرزينيـن الثقـال
اللـي صـروح المعرفـة بالتجربـة ترقالـهـا

لن التجارب للفتـى وقـت الشدايـد راس مـال
تغنيه من بعض الأمـور اللـي تعـب يسعالهـا

وكلمـة نعـم ولا كفـو ياهـل الفعايـل ماتقـال
ياكـود لـلـي يرتـكـي لخفافـهـا وثقالـهـا

حنـا بشـر دم ولحـم نخـطـي ولله الكـمـال
والنفس مهما صـار ماتجـزى بغيـر أعمالهـا

نسعى بدنيانـا ونـدري تالـي العمـر الـزوال
وابليـس يدفعنـا علـى الفتنـة وشـد احبالهـا

نسعى ونطرد والمصير المـوت والقبـر الهيـال
غيـر الأمـور المقبلـة والقارعـة وأهوالـهـا

والرابح اللـي يمسـك السنـة ودرب الإعتـدال
اللي عصـم نفسـه وشـارات المكـارم نالهـا

اللي مشى درب الهدى وابعد عن اصحاب الضلال
ماغرتـه دنيـا الفنـا بزهـورهـا وأموالـهـا.