اتنفسك في الغياب وحضرتك ناسي

ما زلت أتنفسك وما زلت أحتاجك
وما زال حسك معي يالقاطع الناسي

ما زلت في الذاكرة من يطفي سراجك
من يوهم الليل واحزاني وحراسي

ومن يقدر يطول قلبي عرشك وتاجك
لو شاف تتعب عيونه يا بعد ناسي

ولو كنت تفتح اذا تشتاق ادراجك
بتشوفني هناك مع حبري وقرطاسي

ما انكر اني وانا في صلب منهاجك
كنت املأ بالحب والتقدير كراسي

واروي من عيونك الخجلى من حجاجك
كل التفاصيل لين تفيض من كأسي

يا مزعل الغيم من حسنك وديباج
ما جيت لك غير ظامي منكشف رأسي

أحمل على كتوف صبري سلة احراجك
وارمي بها في غياهب دافي احساسي

ليييين اقنعك انني ما زلت محتاجك
واتنفسك في الغياب وحضرتك ناسي