اصبر عليك

اصبر عليك




مادام مافيش ف حياتى غيرك..ودنيتى اتخلقت عليك..
مادام راضينى اكون اسيرك..ومعرفش اعيشها الا بيك..
يبقى اقبلك.. واصبر عليك..
واتهنى بالمر اللى فيك..
واغفر خطاياك القديمه..وانسى الذنوب المستديمه..
مهوانت انت..
مهما بيمر علينا..
كتيروعود اتبخرت..
فوق التراب اتبحترت..
تقول جديد..وتروح بعيد..
وانا بشر.. ومش حديد..
وكل يوم تخلق سبب..وعذر اعجب م العجب..
بسمع واستغرب..واستنى تجرب..
مش ح اخسرك.. واعيش وحيده..
وتكون لغيرى.. واكون بعيده..
انا دنيتى اتخلقت عليك..
معرفش اعيشها الا بيك..
يبقى اقبلك..
واصبر عليك..

ناقصنى انى مشتكيش..واسكت واستحمل واعيش..
لو عايزه قصه متنتهيش..اشوف عيوبك.. واقول مافيش..
طول مالجروح بتطيب بايدك..اسكت واتحمل جديدك..
ماسألش ليه تعمل كده..
وان كان سكوتى مش رضا..
لو عايزه اكون وياك مقولش..ولا اسألك و اعمل معرفش..
مقولش فين..
ماسالش بتروح عند مين..
لو محتاجاك..اصبر يومين..
واكتب اسمى مع الصابرين..

طول ماحياتى محتاجالك..
مفضلش اسأل ايه جرالك....
اسكت ماسالش..واعمل معرفش..
علشان ماندمش..
واقبل وارضى بتفسيرك..
واصبر ماثورش ولا اشكيلك..
واقنع نفسى باعذارك..
حتى ان ماكنتش على بالك..
وح اقول حبيبى مبيغلطش..انا اللى بغلط ولا بسكتش..
طول مابعيش من حبك اقبل..
كل شروطك ف المستقبل..
ماعرفش اعيشها الا بيك..
يبقى اقبلك..
واصبر عليك