بسم الله الرحمن الرحيم
طبعا كلنا عارفين ان لكل وقت أدان وان الاشياء تختلف باختلاف السنين ودة طبعا لان لكل عصر متطلباتة
فمثلا كان من 10سنين كنت ممكن تتجوز بألفين جنية انهاردة عشان تتجوز عايز 100 الف جنية اقل واجب
متطلبات العصر بقى هنعمل اية
الحب زية زى اى حاجة يا جماعة بيتغير تبع متغيرات العصر
مثلا ايام قيس وليلى كان الحج قيس يقعد يالف قصايد فى ليلى ويقف تحت شباك الخيمة بتاعتها ويقوم حادف الشباك بتاع الخيمة بطوبة ويفضل يقولها الشعر اللى بقالة كام شهر بيالف فية
فية ناس كانت بتقول علية انة صايع و عواطلى قاعد بس يكتب شعر فى ليلى اللى اساسا مكنتش بتفهم ولا كلمة من اللى هو بيكتبها بس كانت مبسوطة من اللى طول الليل تحت الخيمة بيقولها شعر
نيجى بقى لعمنا عنتر
حب المعاناة
هو بيحب عبلة
يضرب بردوة بيحب عبلة
عمة يبهدلة ومش معترف بية وهو بردوة بيحب عبلة
فى بقى العصور الحديثة اختلفت مقاييس الحب
تيجى مثلا فى الخمسينات
تلاقى الواحد ماشى ورا الواحدة وهى رايحة المدرسة ويفضل طول النهار ماشى فى الشارع بتاعهم تخت الشباك لحد ما يجيلوة ضربة شمس ممكن يروح فيها
فين وفين بقى لما البنت تطلع تبص علية وتضحكلة ضحكة من الشباك
اكيد لازم امها تشوفها وتعرف الموضوع
بعد كدة امها تستلمة كل اما يعدى من الشارع تدلق علية مية والزبون ولا فى دماغة
بيحب بقى
كل يوم يستحمى بمية الذبالة ولا فى دماغة
فى التمانينات كان الورد مقايس الحب
روح لاى واحدة اديها وردة تعرف انك بتحبها على طول ولا عطيتها بوكية ورد تعرف انك عايز تخطبها
اما فى عصر النت والموبايل الامور بقت سهلة قوى وطبعا كلكم عارفين
انا بقى الحب عندى حاجة مختلفة خالص
علشان لو واحدة فيكم حبت تحبنى ولا حاجة تعرف الحب عندى اية
الحب عندى مش ان الواحد يجيب لحبيبتة ورد كل يوم وللا يقعد يبص فى عنيها طول النهار باعتبار انه بيسرح شعرة فى عنيها يعنى؟؟ الحب أكبر من كده بكتير..
الحب ان حبيبتى تجيب لى قميص جديد فى عيد ميلادى وانى أحول لها خمسة جنيه رصيد فى عيد ميلادها
الحب انى دايما أمشى بفلوس مجمدة عشان هيه اللى تدفع تذكرة المترو
الحب انى دايما اروح الحمام فى نهاية قعدتنا فى الكافتريا عشان هيه اللى تحاسب
الحب انها تقول لى بحبك .. وساعتها اكون بخلص المستوى التاسع فى لعبة التعبان بتاع الموبايل
الحب حاجات كتير أعمق من مجرد ورد وكلام فاضى
افهموها بقى