حظى قرار محكمة استاد بورسعيد الذى صدر بإحالة 21 من المتهمين إلى فضيلة المفتى، بتباين فى الآراء بين العديد من النشطاء على شبكتى التواصل الإجتماعى "فيس بوك" و "تويتر".

حيث أيد عدد منهم القرار، بينما وصفه آخرون بالـ"مسيس"، الذى جاء ليخمد نيران الأولتراس الذين توعدوا بإثارة الفوضى فى البلاد فى حالة عدم القصاص.

وفى نفس السياق وصف بعض النشطاء المتهمين بأنهم كبش فداء، وأن المتهمين الفعليين مازالو بعيدا عن طائلة القانون.


ورصدت بوابة الفجر أبرز التعليقات التى تداولها النشطاء:-

ــ انا مستغربة جدا من مزايدة بعض الناس على اولتراس اهلي، امال انتوا كنتوا عايزين ايه طيب فهموني يعني عشان اتابع معاكوا؟ يعني 74 يموتوا فطيس؟.


ــ نتعلم من كفاح الاولتراس وراء حق صحابهم ايه ؟ انت ليك حق في الشارع انزل جيبه متستناش حد يجيبلك حقك طول ما انت بتضغط هتجيب حقك .





ــ ٢٢ قتيل + ٢١ محكوم بالإعدام طيب ما مرسي يعلن بورسعيد مقبرة جماعية ويتوكل علي الله يكمل رحلته لأثيوبيا.



ــ الناس اللي نازلة في بورسعيد يموتو هما بيموتو علشان الفكرة مش علشان عدد اللي بيموت، واحد زي مليون، عيب لما الثوار يحسبو القتلى بالأعداد !!.



ــ ياجماعه اركزوا . دلوقتى مات 18 ..اعتراض على 21 هايتعدموا .. صدقونى المشكله مش فى الحكام المشكله فى الشعب .. والناس والضمائر والمعامله بالدين صح ... اللى احنا فيها ده بلاء .. ركزوااا.



ــ في 18 ماتوا في بورسعيد لحد دلوقتي ياريس، مش هتتويت تعزي فيهم ولا ايه ؟!!.



ــ مبروك للاولتراس الرجالة اول قصاص من بعد الثورة .





ــ امبارح 8 ماتوا فى السويس وواحد فى اسماعيليه وانهارده حوالى 14 واحد فى بورسعيد

تقريبا العراق بقت بتغيير مننا .



ــ الفاعل يجب أن يُحاسب .. والمُحرِّض يجب أن يحاسب .. و المتساهل فى التأمين متواطىء يجب أن يحاسب .





ــ قد تختلف مع الاولتراس كفكرة او تختلف مع اسلوبهم ....... او حتى مع تصرفاتهم لكن الاولتراس دول رجالة

دول اللي وقفوا الدوري غصب عن عين الدولة و الداخلية و اتحاد الكورة

دول اللي قعدوا السلطة و المعارضة على اعصابهم قبل الحكم بتاعهم

دول اللي خلوا يوم 26 يناير اهم و اخطر من يوم 25 يناير

و علشان كده طلع الحكم النهارده كده الحكم الوحيد من بعد الثورة لغاية النهارده اللي طلع بالاعدااااااااااااااااام

بقية قتلة الثوار طلعوا براءة علشان ماعملوش زي الاولتراس

لما يبقى الظلم قانوني ..... يبقى لازم تشيل الظلم بإيدك و تضرب بالقانون عرض الحائط زي ما اللي بيحكموا ضربوا بيه عرض الحائط